呢排香港都開始冷，好多愛心人士又開始叫大家唔好買羽絨外套！咁其實唔著羽絨又可以點樣保暖呢？相信位於芬蘭嘅我，可以比少少意見大家！
今年係我喺芬蘭過嘅第九個冬天，我都未著過一日羽絨，亦唔需要著羽絨，而我亦唔係體質好嘅人。就算係負廿幾度，出街由內到外都唔會穿得多過三件衫 (普通室內衫，薄外套，纖維大衣)，加手套，圍巾和帽 (因為個頭夠暖，身體會暖和好多) 。
咁小朋友又點著呢？一樣三件！室內衫，一件頭純羊毛衣加一件頭或二件頭嘅纖維外套(100%polyester)。同大人一樣，帽，圍巾，手套，不過頂帽最好係成個頭包住嘅羊毛帽，因為可以耳仔都包到。或一頂薄加一頂厚嘅帽! 超過負十五度，最多最多毛衣內加多件衫。唔可以著太多，如果唔係就會好難係出面玩。係㗎，係芬蘭如果唔係傾盆大雨，唔低過負廿度，學校一定會安排小朋友出外玩，操練操練！
據我所知只要衣服上嘅纖維有足夠能力把暖空氣鎖住，就可以發揮保暖的功效。芬蘭負十幾二十度都得，相信世界上無幾多地方係唔得！所以我認為其實用唔用羽絨就好似用唔用皮草咁，係個人喜好而非必須品！
Search